Acts 23

1Shi Bulus ɓo gni a shaula zhinyi abye wa gna, Omi azaje, mi ku zan-zan n Shekwoyi abye cici n bugba manayi yi.

2Nwo ɓeda zun-zunyai Hannaniya prist dnagmayi wa gna zaho ge wo lu Bulus ngbe.

3Bulus wa gna ge Shekwoyi ɓa ce hohim pmi, oho nyakunpa bui-bui, kni alkali yi pya nu tu, to woi vi owan woi gna za ge wo ce mi pmi a?

4Aza nɓa ɓei zhi vivi n Bulus yi ɓa gna wo ge, ɓedanu n ho da n Shekwoyi piristi dnagmayi?

5Bulus wa gna, mi ta kpe lo ge wo nu zhin pirist dnagmayi m, ntu ge Shekwoyi ɓeda gna ge to da ɓeda nukwoyi tu n fye abegyiyi tukwo m.

6Amma shi Bulus ɓo kpe ge a Sadukiyi ɓei fi ɓo ɓedo Afarisiyi wa gna, omi azaje mi zhin Farisiyi nu emi azakwoi vinya ɓei zhin Afarisiyi nu Mihin kwa a da mi owa ntu ge mi gaiciya ga ge efi kalaku lo nu.

7Shi wo ɓei da lonu aza yezhi, ɓa gnaj e ngun aba a Sadukiyi na Farisiyi. 8Ntu ge a Sadukiyi gna ge efi kalaku to nyi m, amalaika to nyi m, Zafun nyalo-nyalo nya to nyi m, amma a Farisiyi n gaiciya ga na ɓeye vinya.

9Aɓo ɓa ku gmaje na shaula zhin ba. A Yahudiyi abye da ɓai gna ɓa to gye Bulus laifi m, Ɓa naɓo najei. Ɓa gna kpesun Zafun ko malaika nu ɓei daɓo n Bulus yi n Dimashika zokwo.

10Ɓai ɓowyi n kala yi, aza ku she Bulus gnu ɓai gni wo laɓa. Safyewyi a soja tukwoda wa gna asoja ge ɓa la Bulus lo cei n ɓa barki woi gye ngye a Yahudiyi ɓa wu wo.

11Nsukwoyi Dagayi wa daɓo n Bulus yi wa gna wo ge to damun, ngye shi ho ku mi seda zhin n Urushelima aza abye nyi elonu ho ɓa zhin n Roma.

12– 13N labmi yi aza ɓei du shinyi (40) nɓa ɓei la nyasi si ge ɓa ta gyi nyagyi kwo ɓa sin nuwan, sai ɓa la Bulus wu. 14Ɓa lo ɓa ku gna a Pristi dnagmayi na byeda yi enya ɓa ye ɓa zhin. 15“Fye lo fye gna asoja tukwoda” nji a prist ɓedo abye da yi “wa ɓe n Bulus yi njesun a shaula zhin ba, shi a ɓe n woi, ya wu wo n zokwo.”

16Amma Bulus zhalu wa ku wo, wa lo wa ku gna Bulus na soja barki.

17Bulus wa yi soja dnagmayi ho wa gna wo ge, “Lo n ɓi ye yi nfye tukwoda aba wo ɓo kpakala yi lo wa gna wo.”

18Soja yi wa lo woi wa gna, Bulus na gna ge mi ɓe nɓi ye yi nho aba, nge wo nɓei lo wa gna ho.

19A soja tukwoda wa la ɓihi wa gni n woi n gna-gna wa nya wo ge, Ho ye ha gna mi kni ɓo yi nu a?

20Ɓihin wa gna nsu a Yahudiyi ɓei gna ho ge ho ɓe n Bulus yi na Shaula zhin ba njesun. 21Amma to ɓei ye m. Aza lo n du shinyi n bwi fi n gbe-gbe ge, shi aɓe nwoi ɓa wu wo n zokwo. Ɓa ta sin nuwan kwo ɓa gyi nyagyi m, sai ɓa la Bulus wu. Ɓa cei kma lo ɓa ɓe ɓa nya ho.

22A soja tukwoda wa gna oɓihi n ge to gna zaho-zahoi ge ho ku ɓeye gna mi m. 23Sai a soja tukwoda wa yi asoja dnagmayi aje wa gna ɓa ge, Ifye zhin shiri na soja yi 200 ɓa lo Kaisariya nsukwoyi naiye. Fye ku amashi da 200 a dokwo da yi 70. 24Fya ga Bulus dokwo wa tu fya lo woi n Gwmna Fileks aba.

25Wa ku wasika ka ga Feliks wa gna.

26Wasikaye gmi n Klaudiyus Lisiyas aba nu kwoi ɓe Gwamna Feliks aba Shekwo mwasa hoi, gnaɓi ɓe ho aba.

27Oza deye a Yahudiyi na wan wo ɓai ye ɓa wu wo, amma ma tnu na soja yi ɓa gwo wo nɓa kun ntu ge nɓo ku wo ge wo zhin Roma yi nu. 28Ma la wo ma lo cei nɓa shaula zhinba, ntu ge ma wo laifi n wa zhin. 29Ma gye ko zhin oɓa a Yahudiyi adini ɓo nu n na kunnu yi. Ɓehin-hin ɓe ho to lo nkwo ɓa zhin adna wo n kurkuku m. 30Amma shi ma wo ge ɓa ku shiri zhin ɓa wu wo, ce na zhin mi tnu n woi n ho aba. Mi ku gna owo akala zhinyi ge ɓa ɓe n wo alaifi yi nho abye. Aku zo.

31A soja ɓa la Bulus n sukwoyi ɓa lo woi n Antipata. 32N Labmi yi a soja ɓa jeze ɓe ɓa barki ɓa fa Bulus na dokwo da yi, ɓa lo woi n Kaisariya.

33Shi ɓa ɓei si Kaisariya ɓa wasika ga Gwamna, ɓa wu wo Bulus njesun. 34Shi wo ɓo la wasika ba wa nya Bulus aba n wo gmi, Bulus wa gna mi gmi n Silisiya nu.

35Gwamna wa gna wo ge n ɓei wo ho ɓeda, esa nho akala gayi ɓei ku ɓe. Gwamna wa gna asoja ge ɓa la wo dna n kurkuku n Hirudus galukwo.